Vantaçs pai guviers

Taler al furnìs responsabilitât par sigurâ che lis impresis a operin in mût legâl, rispietant ancje lis libertâts civîls dai citadins. Taler al è un sisteme di paiament basât su standards vierts e software libar. Taler al à dibisugne dai guviers parcè che a stabilissin un cuadri finanziari e a operin come regoladôrs fidâts. Taler al contribuìs ae sovranitât digjitâl te infrastruture finanziarie critiche.

Tassabil

Taler al è stât costruît cul obietîf di combati la coruzion e supuartâ la tassazion. Cun Taler, il ricevidôr di cualsisei forme di paiament al ven identificât cun facilitât dal guvier, e il marcjadant al pues jessi obleât a furnî il contrat acetât dal client. I guviers a puedin doprâ chescj dâts par tassâ lis impresis e i individuis in base aes lôr jentradis, rindint mancul fatibii la evasion fiscâl e i marcjâts neris.

Cussì, ancje se al ufrìs l'anonimât ai citadins che a spindin monede digjitâl par comprâ bens e servizis, Taler al sigure ancje che il stât al puedi osservâ i fonts in jentrade. Chest al pues jessi doprât par sigurâ che lis impresis a fasin nome ativitâts legâls e no eludin la taie sul redit, la taie su lis venditis o la taie sul valôr zontât. Dut câs, cheste capacitât di osservazion no si estint al ambit personâl imediât. In particolâr, il monitoraç nol cuvierç l'acès condividût ai fonts cun amîs e parincj fidâts, o la sincronizazion dai tacuins su plui dispositîfs.

Sigûr

I paiaments di Taler a son sigurâts in mût critografic. Cussì, i clients, i marcjadants e il furnidôr di servizis di paiament Taler (l'Exchange) a puedin dimostrâ in mût matematic il lôr compuartament legâl in tribunâl tal câs di dispudis. I dams finanziaris a son rigorosamentri limitâts, miorant la sigurece economiche pai individuis, i marcjadants, l'Exchange e il stât.

Come furnidôr di servizis di paiament, l'Exchange di Taler al è sogjet ae regolamentazion finanziarie. La regolamentazion finanziarie e lis revisions periodichis a son fondamentâls par stabilî la fiducie. In particolâr, il dissen di Taler al oblee la esistence di un revisôr indipendent che al controle lis provis critografichis che si acumulin tal Exchange par sigurâ che il cont di garanzie (o il cont interni di regolament) al vegni gjestît cun onestât. Chest al sigure che l'Exchange nol meti in pericul la economie par vie di frauts.

Libar

Taler al è software libar che al implemente un standard di protocol viert. Cussì, Taler al permetarà la concorince e al evitarà la monopolizazion dai sistemis di paiament che vuê e met in pericul la stabilitât politiche e finanziarie globâl.

Eficient

Taler al à un dissen eficient. A diference dai sistemis di paiament basâts su blockchain, come Bitcoin, Taler nol metarà in pericul la disponibilitât des rêts eletrichis nazionâls ni al contribuìs (in mût significatîf) al incuinament ambientâl.

Taler e la regolamentazion

Anti riciclaç di bêçs (AML)
Cun Taler, lis jentradis a son visibilis e a puedin jessi leadis al contrat firmât di dutis dôs lis parts.
Cognòs il to client (KYC)
In Taler, il paiadôr e il ricevidôr a son cognossûts midiant i lôr conts bancjaris rispetivamentri cuant che a prelevin o a dipositin monedis
Regolament gjenerâl su la protezion dai dâts (GDPR)
Taler al protêç in mût critografic la riservatece dai citadins e, par dissen, al implemente la minimizazion dai dâts e la riservatece in maniere predefinide.
Diretive sui servizis di paiament (PSD2)
Taler al furnìs un standard viert cun API publichis che a contribuissin a un setôr bancjari competitîf.

Taler al furnìs riservatece e responsabilitât

Taler al supon che i guviers a puedin osservâ i bonifics tradizionâi che a jentrin e a jessin dal sisteme di paiament Taler. Tacant dai bonifics, i guviers a puedin otignî:

  • L'impuart totâl di valude digjitâl prelevât di un client. Il guvier al pues imponi limits su trop monede digjitâl che un client al pues prelevâ dentri un dât periodi di timp.
  • Lis jentradis ricevudis di cualsisei marcjadant midiant il sisteme Taler.
  • I detais precîs dal contrat sotanât che al è stât firmât tra client e marcjadant. Dut câs, cheste informazion di solit no includarès la identitât dal client.
  • I impuarts di monedis digjitâls prelevadis in mût legitim dai clients dal Exchange, il valôr des monedis digjitâls no ridintis tai tacuins dai clients, il valôr e i detais di bonific corispuindints des operazions di dipuesit fatis dai marcjadants cul Exchange, e lis jentradis dal Exchange des comissions di transazion.